27 апреля 2017, 10:05 | Саха cирин ытыктабыллаах олохтоохторо!

95 сыл анараа өттүгэр, 1922 сыл муус устар 27 күнүгэр, Саха АССР тэриллибитэ. Онтон 70 сыл буолан баран, өрөспүүбүлүкэҕэ Россия Федерациятын субъегын статуһун иҥэрбит уонна биһиги норуоппут федерализмҥа дьулуһуутун олоххо киллэрбит Саха Өрөспүүбүлүкэтин Конституцията ылыныллыбыта. Бу күн биһиги Саха Өрөспүүбүлүкэтин төрүттээбит уһулуччулаах судаарыстыбаннай деятеллэрбитин Максим Аммосовы, Платон Ойуунускайы, Исидор Бараховы, Степан Аржаковы истиҥник ахтабыт-саныыбыт, кинилэргэ дириҥ ытыктабылбытын биллэрэбит.  

Төһө да ыарахан буоллар, төһө да уустук соруктар турдаллар, биһиги өрөспүүбүлүкэбит бу кэрдиис кэмҥэ сайдыы суолун тутуһан кэллэ, элбэх киэҥ далааһыннаах бырайыактар олоххо киирдилэр. Онуоха биһиги сүрүн дьоруойбутунан, хотугу сир тыйыс усулуобуйатыгар айааччынан-тутаааччынан Саха сиригэр олохсуйан олорор элбэх омуктан турар норуот буолар.

Бүгүҥҥү күҥҥэ өрөспүүбүлүкэ судаарыстыбаннай бэлиитикэтэ дьон олоҕун хаачыстыбата үрдүүрүгэр, олохтоох бэйэ оҥорон таһаарыытын сайыннарарга, саҥа бырайыактары олоххо киллэрэргэ, элбэх үлэ миэстэтин таһаарарга туһуланар. Элбэх оҕолоох уонна кыаммат ыалга көмө саҥа механизмнара олохтоноллор, дьон-сэргэ сөбүлүүр үлэтинэн дьарыктанарыгар, бэйэ бизнеһин тэринэригэр усулуобуйа тэриллэр уонна кыах бэриллэр.

Глобализация кэмигэр Саха Өрөспүүбүлүкэтин норуотун иннигэр ураты сорук турар – кэлэр көлүөнэҕэ духуобунай уонна култуурунай сыаннастары чөл хаалларыы уонна сиэр-майгы тускулларын иҥэрии. Биһиги бары күүспүтүн түмэн, хас күн аайы дьулуурдаах үлэбитинэн, сиэрдээх олохпутунан өрөспүүбүлүкэбит сайдыыта бигэ буоларын хааччыйыахпыт, аҕа дьоммут ситиһиилэрин салгыахпыт. Биир сомоҕо буолан иннибитигэр турар бары соруктары толоруохпут диэн эрэнэбин.

Барыгытыгар дьолу-соргуну, чэгиэн-чэбдик буолууну баҕарабын! Хас биирдии дьиэҕэ истиҥ сыһыан, кэскиллээх үтүө санаа олохсуйдун!  

 

Саха Өрөспүүбүлүкэтин

          Ил Дархана                                          Е. БОРИСОВ